Sondela

Sondela
****
http://www.sondela.com
S24 53.655 E28 23.647

Wat 'n aangename ondervinding! Ons het sowat 3 jaar gelede ook hier gekamp, maar al vergeet hoe lekker dit hier is. Die ouens dink aan alles en hulle diens was puik!!

1. Waar is die kampplek geleë is (Km van naaste dorp, op watter pad)
Sowat 10km aan die Oostekant van Warmbad Bela-Bela (S24 53.655 E28 23.647). Vanaf die N1 se afrit by Warmbad Bela-Bela draai jy Oos en dan is die reservaat aan jou Linkerkant.

2. Die koste van die kampeerterrein toe jy dit besoek het sowel as die...
R300 per nag per staanplek.

3. ... datum van jou besoek.
Vrydag 9 Okt tot Sondag 11 Okt 2009

4. Die fasiliteite wat by die oord te vinde is.
Die kamp is van uitnemende standaard met lowergroen gras en baie bome. Daar is 64 staanplekke en ek sal dit as 'n medium grootte kamp klassifiseer. Kyk mooi uit vir die staanplek grootte wat jy bespreek. Sommige van hulle is bietjie knap tussen die bome ingepas en ander het meer ruimte.

Die Ablusies is skoon en daar was baie warm water. Die storte het hakkies, bankies vir klere, maar ongelukkig net 'n stort gordyn. Hier is ook 2 familiebadkamers wat goed sal werk met kleingoed of vir jong getroudes.

Die staanplekke is goed toegerus met 'n kraan, asblik en elektriese punte. Braaiers met sementblok basisse is verskuifbaar.

Met aankoms word pannekoeke en vrugtesap as verwelkoming aangebied. Jy kry ook 'n sak ys en 'n sak hout per staanplek.
Personeel wys jou aan tot by jou staanplek en staan onmiddelik reg om jou te help kamp opslaan. 'n Bediende was ook gou byderhand om 'n skottelgoedwas diens aan te bied en vra nie geld daarvoor nie, maar 'n fooitjie (tip) as jy wil.

Teen laatmiddag elke dag, het 'n personeellid ook by ons staanplek aangedoen en verneem of alles in orde is. Teen vertrektyd is 'n vraelys ook uitgedeel om punte toe te ken van jou naweek se ondervinding. Weer was helpers byderhand om te help afslaan.

'n Winkeltjie met snuisterye en die nodigste, asook 'n restaurant is by die swembadarea beskikbaar.
Teen Saterdagaand het 'n dame selfs kom bestellings neem vir die Sondagkoerante die volgende dag!

Die karavaankamp het sy eie swembad en nog 'n warm en koue swembad is by die hoofkompleks beskikbaar.

Daar is so 5km se mooi grondpad van die ingangshek tot by die karavaankamp. Met vertrek by uitgangshek het die manne reggestaan met tuinslang en seep en my voertuig en karavaan se stof is fluks afgewas!

5. Aktiwiteite wat by die kampplek bygewoon kan word (Indien relevant)
Wildkyk! Saam met jou staanplek fooi, is ook 'n gratis wildsrit ingesluit. Die is agter op 'n trekker & sleepwa. Ons het dit die vorige keer meegemaak, maar wou nie die keer met die klein baba nie.

Verder bied hulle alle vermaak en aktiwiteite vir die kinders wat jy maar aan kan dink. By die plaaswerf kan kinders na plaasdiere kyk, koeie melk, perdry en, en. 'n Hele aktiwiteisprogram loop ook met volleyball kompetisies en allerande ander vermaak.

Die ekstra myl
Die hele ervaring wat ons gehad het, was dat die personeel nie terugstaan om jou 'n eersteklas diens en kamp te lewer nie. Ons sal beslis weer gaan en ek sou 5 sterre uitgedeel het (dit moet bloot op 'n tegniese punt wees dat net 4 sterre toegeken is).

Groete,
Jacques

Fotos:

Restautant

Restaurant

Koue Swembad

Warm Swembad

Lowergroen gras by die Swembadarea

Boomhuis

Plaasdiere

Personeel hou die terrein baie netjies

Kamp

Kamp

"Vrou!! Kyk!! Daar's 'n koedoe in ons tent!!"