Lichtenburg Vakansieoord

Van die gereelde besoekers aan die forum mag moontlik ‘n inskrywing wat ek Dinsdag, 27 Desember 2011 tov ons ervaring by Lichtenburg Vakansie-oord die vorige week gehad het, onthou.

Hierdie inskrywing is ongelukkig op aandrang van genoemde oord se prokureurs deur WegSleep verwyder.

Ek wil graag op rekord my waardering plaas vir die manier hoe Zigi hierdie saak hanteer het.

Die forum maak voorsiening onder “Terugvoer oor kampplekke” vir “Hier kan julle lees oor ander kampeerders se ervarings by spesifieke kampplekke in hierdie provinsie.”, in hierdie geval, Lichtenburg Vakansieoord in Noordwes. As lid van die publiek, en aktiewe, verantwoordelike kampeerder, maak ek van hierdie voorreg gebruik om ons ervarings by woonwa-oorde – goed of sleg – te deel met die kampeer-gemeenskap waarvan ons deel is.

Liewe vriende, na aanleiding van my terugvoer soos na verwys hierbo is ek, die forumlede wat kommentaar op my skrywe gelewer het, en WegSleep, deur ‘n prokureur namens die oord gedreig met onder meer siviele regstappe, skadevergoeding en verlies aan inkomste. Die prokureur het WegSleep versoek om my skrywe sowel as al die reaksies daarop met “onmiddelikke effek te verwyder”. Vervolgens was my skrywe en die reaksies daarop volgens die dreigbrief “wesentlik defamatories van aard, eensydig en die inligting daarin is vals”. Met ander woorde, ek en my familie word as leuenaars uitgemaak.

Die reaksie van die oord deur hulle prokureur was slegs aan Zigi (WegSleep) gerig. Ek is nooit in die verband deur die oord of hulle verteenwoordiger gekontak nie, al het ek dieselfde skrywe voordat ek dit op die forum geplaas het, direk aan die oord volgens hulle vonkpos-adres op hulle webwerf gestuur. Tot op hede het ek geen erkenning van ontvangs of enige kontak van hulle gekry nie.

Ek aanvaar ook dat my terugvoer eensydig was. Natuurlik is dit eensydig – dis ons weergawe van die gebeure en hoe ons dit ervaar het. Die oord het nie gebruik gemaak van die geleentheid om hulle kant van die saak direk op die forum te stel nie, soos wat wel die geval is in vele ander skrywes waar beide kante se saak gestel word, en die gebruikers van die forum dan hulle eie opinies in die verband kan vorm. Tot vandag toe wonder ek hoekom die oord nie van die geleentheid gebruik gemaak het nie. Of eerder, ek het my eie opinie oor hoekom hulle die roete gekies het wat hulle wel gekies het.

Ek wil dit graag op rekord stel dat geen van die inligting of stellings wat ek in die skrywe gemaak het, vals of oneerlik was nie. Daarvoor is ek, Annatjie en Alwyn (ons gestremde seun, wat tydens die intervensie wel teenwoordig was in die oord se kantoor), bereid om onder eed te gaan. Ons integriteit in die verband is vir ons onvoorwaardelik, en elkeen van ons lewe met sy en haar gewete.

Elkeen na sy of haar eie persoonlike keuse, maar hierdie van Staden-gesin sal onder die huidige omstandighede nooit weer by die Lichtenburg Vakansieoord wil kamp nie. Daar is geen regverdiging om ‘n vrou en ‘n persoon met gestremdhede ooit of onder enige omstandighede so te behandel nie.

Baie dankie vir die personeel van die oord wat ons wel menswaardig en met empatie behandel het.