Tuinroete Desember 2011. Deel 2, met kleiner fotos.

Nog so 'n paar oor Thesen's Islands. Daar is 'n totaal van 19 kleiner eilande in die ontwikkeling. Groepies huise is op elke eiland gebou, elk met sy eie jetty. Die waterweë is lekker breed en met laagwater so 1,5m diep. Huispryse daar wissel so vanaf R2,3 miljoen tot so ong. R14 miljoen. 'n Plek waar mens lekker kan loop en droom en jouself sommer net kan verloor.

Nog 'n gedeelte van die Marina.

Een van die groter eilande met "Appartment" op.

Lekker droom, Willempie.

Hy is te koop.

'n Seester in een van die waterweë.

Betonstruktuur van die ou Thesen Hawe nog in sy oorspronglike toestand.

Die ou Thesen Jetty, nog met die oorspronklike ou treinspore. Nou amper heeltemaal weggeroes. Hierdie deel van die eiland behoort aan die staat met die Dept van Omgewingsbewaring, of so iets, se kantore in die agtergrond.

Die waters om die eiland is natuurlik die blyplek van die skaars en bedreigde Knysna Seeperdjies. Ek het die voorreg gehad in 1989 om hulle hier langs en onder hierdie jetty onder die water te besigtig. In daardie jare was daar 'n dubbelverdieping houtgebou op die jetty wat 'n restaurant en die NSRI se kantore gehuisves het en die houtprossesserings-fabrieke was nog in volle produksie. Dit is als afgebreek om die oorspronklike looks van die jetty te herstel met die ontwikkeling van die marina. Die NSRI is verskuif na die Oostelike heads toe en op 'n perseel net langs die restaurant by die wit baken op die rotse waar die Paquita se wrak lê, gehuisves. NSRI, Station 12.

Die laaste drie fotos is geplaar vir hulle fotografiese waarde, WilSur. Mooi nê?

Vrystater, as jy 'n volle twee weke daar spandeer en elke dag ten minste vir 5-6 ure spandeer om die plek te bekyk, asook die omgewing, kan jy dalk so 3/4 van alles te siene kry. Ek moes elke dag die meisies omry Brenton-strand toe en weer gaan hal. Dit het baie van my tyd in beslag geneem.

Andre Beyleveld, my vrou het vir my vir krismis 'n boekie as geskenk gegee wat deur een van die dames wat vir die ontwikkelingsmaatskappy, wat die eiland ontwikkel het, gewerk het. Sy het die hele ontwikkelingsgeskiedenis hierin geboekstaaf.

Ek sal tog môre vir julle die titel en uitgewers hier kom plaas.

Besoek Noetzie-strand met sy kasteelhuise.

Vanaf Knysna volg die N2 na Plettenbergbaai. Ongv. 3 km buite Knysne draai die pad na regs uit. Volg die grondpad tot by 'n publieke parkeerterrein. Stap die ong. 600m met 'n wandelpaadjie en 'n stel steil trappe tot op die strand.

Vervolg. Bietjie woelig hier vandag.

Die versoeking het my ook beina oorval, HJB. Besluit toe maar om die notisie by die ingang te respekteer en 'n oefeningkie in te kry.

Vir die mense wat nie die plek ken nie; die opritte van die meeste van die huise is van die strand af. So jy kan slegs by die huis uitkom met 'n 4x4.

HJB, het jy gesien hoe vervalle is daardie boonste kasteel op die draai? Dis die oudste een wat eerste gebou was. Wonner of ek nie daar kan gaan plak nie?

Kom ons vat nog so 'n paar draaie om Knysna.

Brenton Lake oord was maar leeg gewees.Hierdie fotos is op 18/12 geneem.

Die paar fotos gee jou 'n idee hoe die kampeerterrein lyk. Lyk my as jy daar 'n sonstaanplek wil hê, moet jy lank voor die tyd aansoek doen vir die enkeles wat daar is.

Brenton-on-Sea.

Netnou gaan ry ons so 'n bietjie in die Knysnawoude rond.

HJB, Tienertjie het nog 'n klomp fotos op haar rekenaar. Ek weet iemand het die klip afgeneem. Ek sal so mettertyd as ek die fotos uit haar gewurg kan kry kom bylas.

Ek hou al in daardie omgewing vakansie vanaf Desember 1978, maar ek was ook self so 15 jaar laas daar deur.

Hierdie was die sesde keer dat ek in daardie area gaan vakansie hou het. Die plek, veral Plet het ontsettend ontwikkel en het nie meer vir my dieselfde admosfeer as toe ek laas by die Robberg Kampeerterrein(Des 1992) gekamp het nie. Die hele area tussen die Beacon Island Hotel en Robberg is toegebou. Die plek het nou heeltemaal te gekommersialiseerd geraak, maar het seker twee van die lekkerste strande wat mens kan kry.

Die restaurant op die hoofstrand, Moby Dick, maak heerlike seegeregte en die pryse is reg.

Brenton is die naaste swemstrand aan Knysna, wat so bietjie van 'n jammerte is.

Ek het my alie af gelag vir die tieners. Die tweede oggend wat ons daar in Knysna was wil hulle strand toe. Ek vat hulle toe af daar na Coney beach toe. Daar is net rotse met so 'n patchie sand hier en daar tussen die rotse. Dit was Aimee, haar mater, Millie en Wian, 'n seun met wie die twee in die kampeerterrein bevriend geraak het. Toe ons die strand bereik staan die drie so almal saam tjoeps stil. Hoogs teleurgesteld en kom die volgende versoek omtrent so saam uit die drie se monde: " Daddy, kan ons nie na 'n genuin strand toe gaan nie? Jy weet? Een met.......vlaggies op?" Ek dog ek skeur my.