Oribi Gorge-hutkamp | Ravyn-rustig
Oribi Gorge-hutkamp | Ravyn-rustig
WegSleep #1 | Januarie 2007
TEKS: Bill Davis FOTO'S: Judy Davis
 |
 |
 |
 |
Telefoon:
039 6791644
Web tuiste:
http://www.kznwildlife.com
Kampering:
Vyf staanplekke met krag; vier bos-staanplekke sonder krag. Ablusies is basies, maar skoon. 
Die Oribi Gorge-natuurreservaat is baie soos die G-kol: Omtrent almal het al daarvan gehoor, maar min spoor dit op.
Dié reservaat van 850 ha is 22 km binneland-in van Port Shepston af.
Hier sal jy nie vertrap word nie, want daar is net nege staanplekke in die reservaat: Sommige is tussen bosse versteek en ander is op ’n oop grasperk naby die hoofkantoorgebou. Dis ’n eenvoudige kamp met ’n mooi uitsig oor die kloof.
Die kampeerplekke en die chalets word omring deur bome en ’n inheemse tuin, wat op sy beurt weer ’n wye verskeidenheid voëls lok. Baie van die bome, struike en aalwyne het naamplaatjies, dus kan plantliefhebbers ’n interessante wandeling deur die park neem.
Geriewe in die kamp is basies, maar voldoende. Daar is ’n snoepwinkel, skoon ablusiegeriewe, ’n kombuis, boma, ’n klein televisiekamer en kinders kan in die reservoir te swem.
Die reservaat bied skuiling aan ’n heelwat wilde diere, insluitende 250 voëlspesies en die blou-aap se skugter neef, die samango-aap. Niemand kan met sekerheid sê of daar nog luiperds in die ravyn voorkom nie, maar ’n mens wil graag glo dat hierdie katte die ontwikkeling van die omliggende omgewing oorleef het.
In 1917 is ’n voetpad deur die ravyn verbreed, sodat nedersetters van die nabygeleë Oribi Flats beter toegang tot Port Shepstone kon hê. ’n Laagwaterbrug is in 1920 oor die rivier gebou, maar die huidige teerpad is eers in 1932 deur die kloof gebou.
Die pad volg ’n ou olifantspoor en bied vandag slegs toegang vir natuurliefhebbers wat die reservaat, wat in 1950 geproklameer is, wil verken. Daar is ook verskeie staproetes piekniekplekke langs die rivier onder in die kloof.
As jy Oribi as jou basis gebruik, kan jy baie plekke in die omgewing verken. Die Oribi Gorge Hotel (onlangs gemoderniseer) bied toegang tot uitsigpunte oor die ravyn en die “Wilde Vyf” – die berugte ravynswaai, witwaterroei, ’n foefieslaaid in die ravyn af, abseil en perdry.
Ook hier naby is die Leopard Rock Coffee Shop en restaurant wat koffie en ligte etes bedien. Dit het ’n mooi uitsig oor die Umzimkulu-rafyn. Hier kan jy ook klouter tot op die oorhangende Leopard Rock vir ’n puik uitsig oor die ravyn.
Doendinge: Voëlkyk, stap en piekniek hou langs die rivier.
WegSleep sê: Die natuurskoon en rustigheid maak hierdie kampeerterrein ’n wenner.
Ligging
Jy moet ingeteken wees om oor hierdie storie to gesels. Klik hier om aan te meld.
