Onrus-woonwapark | Ons rus op Onrus
Onrus-woonwapark | Ons rus op Onrus
WegSleep #6 | Feb - Apr 2008 WegSleep #42 (Charles Thompson)
TEKS: Zigi Ekron FOTO'S: Sophia van Taak
 |
 |
 |
Kontak ons:
028 316 1704
Telefoon:
028 316 1210
E-pos adres:
resortonrus@overstrand.gov.za
Web tuiste:
http://www.overstrand.gov.za
Hoe kom ek daar:
Wanneer jy Onrus binnery, volg die hoofstraat en draai af in Moltenostraat tot waar dit by De Villiersstraat aansluit.
Die opknappingsplan behoort ’n groot verskil te maak. Dit word gereeld skoongemaak, maar tans lyk dit nog na iets wat hoort in die weermagbasis.
Kampering:
127 staanplekke met kragpunte en 46 daarsonder. Die staanplekke is ruim en hier is oorgenoeg koeltebome, maar onder die melkoutbome is die gras skraps. Daar is ook 73 semi-permanente staanplekke wat op ’n jaar lange kontrak verhuur word. Moenie dat die naam jou mislei nie: Onrus se bekoring lê juis in die rustigheid hier. Dis grotendeels omdat dit nie so oorontwikkel is soos van die groot dorpe hier naby nie, en die toeriste vertrap die plek darem ook nie te erg nie. (Dink maar hoe lyk Hermanus in vakansietye.) In die walvisseisoen en oor somervakansies is dit ’n goeie basis om die joligheid te geniet sonder om jou vas te loop in Helmut, Heidi en die res van rooigebrande toergroep.
Rhyn Potgieter, oordbestuurder van die Onrus-woonwapark, is op die foon besig om ’n bespreking af te neem. En hy sit sommer vinnig ook die reëls uiteen, want dis ’n groepie jongmense wat die naweek kom. “Ja, julle sal julle moet gedra,” se Rhyn. “Wat’s jou pa se telefoonnommer? Nee, as julle droogmaak, gaan ek nie sukkel nie, ek bel hom direk...”
Voor hom lê twee kaarte wat al 246 staanplekke aandui en met “highlighters” ingekleur is. Daarvolgens kan jy besluit of jy die see of die ablusieblok naby jou wil hê – ons kies die see.
Die oord lê teen die see en strek sowat ’n kilometer van oos na wes. Tot Oktober verlede jaar kon ’n mens nog ongehinderd van enige van die staanplekke onder die melkhoutbome tot op die rotsagtige strand stap, maar die munisipaliteit het pas die hele oord omhein, ook aan die see se kant.
Die besluit was nie sonder omstredenheid nie, want volgens ’n album in die ontvangskantoor met foto’s en koerantknipsels oor die oord se geskiedenis, baklei die dorpenaars reeds sedert die jare vyftig hierteen. Die hoofrede is omdat dit hulle deurgang na die getypoel teenaan die oord sal beperk.
Kampeerders het egter steeds bedags via ’n hek (met ’n wag) toegang na die getypoel.
In die oord self loop ’n teerpad deur die lengte van oos na wes, en die westekant is duidelik die gewildste. Die staanplekke aan dié kant voel asof dit nader aan die see is – selfs by dié wat nie ’n see-uitsig het nie. Die grootste van die park se drie ablusieblokke is ook hier.
Volgens Rhyn gaan die ablusieblokke ook opgeknap word. Met ons besoek het dié geriewe nog sementvloere, sinkwasbakke en ’n paar stukkende teëls gehad.
Naweke is spitstyd hier, maar op die Donderdagoggend wat ons daar aankom, is dit maar ’n stillerige affêre. Rhyn sê heelparty mense het gekanselleer omdat die weerburo ’n winderige naweek voorspel het. Die staanplekke onder die melkhoutbome is redelik beskut teen die wind, maar op die oopte naby die getypoel lyk dit asof die tentflappe behoorlik sal dans.
Doendinge: Wag vir hoogwater en gaan baai dan in Davies Pool of stap van daar af kuslangs tot by die lagoon en kyk hoe die branderryers die golwe by die hoofstrand aandurf. Jy kan ook ’n lekker bord seekos by die Milkwood-restaurant eet, of as jy eerder jou eie vis wil braai, kan jy van die rotse af lyn natmaak. As jy misluk, stuur eenvoudig die kinders om by Molteno’s te gaan pizza haal of ’n wegneemete by Die Wilde Eend te gaan koop.
WegSleep sê: Dis ’n lekker stil kuierplek by die see, en dís wat saak maak.
Ligging
Jy moet ingeteken wees om oor hierdie storie to gesels. Klik hier om aan te meld.
