Koro-Koro | Teen die Bosveldgordyn
Koro-Koro | Teen die Bosveldgordyn
Teks en Foto's: Leon Botha
 |
 |
 |
 |
 |
Selfoon:
082 908 4448
Telefoon:
014 736 2100
E-pos adres:
info@koro-koro.co.za
Web tuiste:
http://www.koro-koro.co.za
Hoe kom ek daar:
Ry van Bela-Bela af uit op die Rooiberg-pad (R516) in Thabazimbi se rigting vir 17,6 km. Draai links op ’n mooi grondpad waar ’n Koro-Koro-bord staan en hou reguit aan vir 1,7 km. Net regs, af van die pad, is ’n ingang met ’n grasdak oor. Die ontvangs is nie ’n halwe kilometer deur dié ingang nie en die kampplek is direk links daarvan.
Kampering:
Hier is 46 plat staanplekke elk op gras met redelike koelte ook met ’n kraan, blou karavaankragpunt en ’n lig.
Wat nog:
Ablusiegeriewe: 16 afsonderlike badkamertjies onder een dak langs die swembad (ook een vir gestremdes met ’n bad) en drie kleiner badkamers by die meer private staanplekke. Die Bela-Bela-omgewing is letterlik die voordeur na die Bosveld wat van hier af deur die westelike deel van Botswana tot in die suide van Zimbabwe strek. Die kanse is goed die Bosveld het ’n duisend jaar gelede gelyk soos hier by Koro-Koro – ongerep.
Die ge-tik-tik-tik-klank van ’n sproeier verraai ’n beskawing hier in die bos op ’n groen lap gras. Energieke vinkies rol-sing hulle roepe opgewonde in die akasias, ’n rooiborslaksman antwoord met sy roep – ’n diep, soet klank – en in ’n ander boom klink nog ’n rooiborslaksman soos ’n visstoktoetertjie.
Voëls is hier volop en wees ook op die uitkyk vir die verskeie neushoringvoëls. (Koro-Koro beteken hoeka “plek van die geelbekneushoringvoël”.)
Tweederdes van die staanplekke is rondom die swembad op ’n uitgestrekte aaneen grasperk uitgelê. As jy meer privaat wil kamp, is die res van die staanplekke ’n ent weg, dieper die bosse in op kleiner lappies gras. Die staanplekke by die swembad het elk ’n gemesselde braai en daar is drombraaie by die ander staanplekke.
Ook langs die swembad is ’n groot grasdakgebou met agt deure aan weerskante. Dit lei na 16 private badkamertjies, elk met ’n aparte toilet, stort en ’n gesigspieël, en een vir gestremdes met ’n bad. Hier is ook ’n aparte wasgoedkamer, maar dit is gesluit. Jy moet by die ontvangskantoor reël vir ’n was. (’n Bondel kos tussen R30-R40 – dit is gewone wasmasjiene, nie die soort wat met ruilmunte werk nie.)
Hier staan ook hout en staal klouterrame met swaaie en ’n trampolien vir die jonges. Die kinders kan ook met hulle fietse op die oord se lieflike grondpaaie rondkerjakker.
’n Werker op sy dikwielfiets met ’n paar rooi weerkaatsers in die wielspeke en ’n ou saal – nog dié met die twee vet vere onder die sitplek – trap stadig deur die kamp. Hy groet beleefd met sy een hand en ry verder tot op ’n punt waar hy sy fiets op sy staander laat rus om ’n sproeier te skuif. Hy klim weer op sy fiets, maar hy stop eers weer om, op versoek van die kampeerders op die staanplek op die punt, die swembadseil weg te rol.
Die ontvangskantoor is sowat 200 meter van die kampplek af in ’n groot grasdakgebou waar jy die nodigste kan koop: hout, roomys en selfs bier of ’n bottel wyn. Jy kan met ’n kredietkaart betaal, maar nie met jou tjekboek nie.
Die toetervoël maak weer sy geluid agterlangs. “Kom outjies, kom kry julle nagereg,” sê ’n pa aan sy kroos in die bos oorkant. “Stadig Boeta, stadig...” sê hy weer.
Doendinge
Ry saam op 'n Six-pack, die Land Rover, om te gaan wild kyk. (R50 p.p. vir ’n uur-en-’n-half-rit oor 5 km). Jy mag ook met jou eie voertuig ry – dit kos R100 vir die hele naweek en jy kry die sleutel by die ontva
ngskantoor vir die hek tot ’n 100 ha stuk grond aan die oorkant van die pad waar die wild loop. Hier is onder meer njalas, volstruise, elande, rooibokke en ’n basterrooihartbees. Die paadjies is mooi grondpaaie.
Koel af in een van twee swembaddens. Die een by die kamp se water is louerig, maar die een by die ontvangskantoor is goed verhit. Die warmwaterswembad (by ontvangs) het aan die een kant ’n houtdek wat onder ’n grasdak instrek, en aan die anderkant staan ’n maroelaboom wat 400 jaar oud geskat word met die lieflikste groen gras rondom.
Ligging
Jy moet ingeteken wees om oor hierdie storie to gesels. Klik hier om aan te meld.
