Forever Resorts | Waterfall Safari Lodge

As springmatte en grappe langs die viswaters jou eerder benoud as opgewonde stem, is hierdie die ideale plekkie om vir ’n naweek in die Kranspoortberge te gaan wegkruip.

En sou die stilte jou Sondagoggend begin inhaal, is die dam en al sy bedrywighede darem net 2 km weg.

Die naam is nie net ’n bemarkingsfoefie nie, van die kampterrein af het ’n mens ’n uitsig oor ’n rotsskeur sowat 700 m verder en in die reënseisoen is hier ’n waterval wat 40 m ver tot in ’n rotspoel stort.

Dis ’n vreedsame toneel en net die plek om ’n bietjie te sit en dink oor watter mooi goedjies jy vanjaar in die kinders se Kerskaartjies gaan skryf.

Hier is ook koedoes, rooibokke en kleinwild soos klipspringers en ribbokkies te sien, en die bobbejane moet jy ook nie vergeet nie. Dié kalante het egter die manier om hulself heel kontant in die kampterrein te kom aanmeld.

’n Exclusive of ’n Classique gaan sukkel om op die tweespoorpaadjie in te kom, maar boswaens en kleiner karavane sal dit met gemak baasraak.

Bring ’n wieltrap saam, die staanplekke is nie gelyk nie.

Waterfall het ook ’n 4x4-baan. Dit neem ongeveer ’n uur om te voltooi, maar is tans erg deur die reën beskadig en die bestuur is teësinnig om onervare bestuurders nou daarop toe te laat.

Wegsleep sê: Dis ’n lekker plek vir kop skoonmaak. Vind net eers uit of daar nie ’n troue of konferensie aan is die naweek wat jy wil gaan kamp nie.

Ligging