Hier's 'n lekker ryspannekoek wat jy kan maak van rys wat jy die vorige dag gekook het.

Gebruik basmati-rys (jy kry dit deesdae vir R10 per kilogram) of mandaryn-rys (koop die gewone een, nie die gegeurde soort nie.)

Moenie die rys afspoel nie, want jy soek juis die stysel om dit te bind, sodat jy kluitjie-rys kan bak.

Jy benodig

• 2 koppies basmati-rys (lang witkorrels)
• 3 koppies koue water
• 1 koppie melk
• 1 ½ teelepel sout
• 2 eiers (geklits met 4 eetlepels ongegeurde jogurt)
• Botter
  

Só maak mens

• Sit, rys water, melk en sout in 'n kastrol en laat dit stadig kook tot dit baie sag is en daar niks vloeistof oor is nie.
• Laat dit afkoel en meng dit met die eiermengsel.
• Verhit 2 eetlepels botter in 'n pan en druk die helfte van die rysmengsel plat in die pan. Kompakteer die rys met 'n eierspaan.
• Braai die ryskoek oor matige hitte tot goudbruin en bros aan die onderkant. Sit 'n papierbord bo-oor die pan en dop die rösti in die bord. Braai dit ook aan die onderkant.
• Sny die rösti in skywe, of breek stukke. Geur met kruie of geurmiddels.