’n Goeie roosterkoek se geheim lê in die knie van die deeg.
Jy moenie haastig raak nie – werk sy sake vir ten minste 10 minute.

Jy benodig

• 2 koppies witbroodmeel
• 2 eetlepels sout
• 1 eetlepel suiker
• 45 g botter
• 1 pakkie (10 g) droë gis
• 300 ml louwarm water

Só maak jy

• Meng al die droë bestanddele saam en vryf die botter in.
• Voeg dan die pakkie gis by en meng dit goed deur.
• Gooi genoeg louwarm water by om ’n stywe deeg te vorm.
• Knie die deeg vir ongeveer 10 minute en laat staan dit dan vir nog 5 minute.
• Vorm nou roosterkoeke (elk so groot soos ’n hoendereier) en laat dit vir omtrent 15-20 minute rys tot die balle twee keer so groot is.
• Bak die koeke oor matige kole bo-op die rooster.
• As jou kole te warm is, gaan die buitenste dop verbrand terwyl die roosterkoek binne-in nog rou is.
• Draai die roosterkoeke gereeld om totdat dit ligbruin en deurgaar is.
• ’n Gaar roosterkoek het ’n hol klank wanneer jy op dit klop. 

WegSleep sê

• Deeg rys op sy beste as jy dit met ’n vadoek in ’n skottel toevou en in ’n sonkolletjie laat staan.