Dis ’n vinnige deeg wat min moeite verg – en die eindproduk smaak soveel beter as winkelbrood. Jy kan dit op die rooster braai, óf sommer in die as.

Jy benodig

• 1 pakkie (30 g) kitsgis
• 1-2 koppies louwarm water
• 1 kg witbroodmeel
• 1 teelepel sout
• 1 eetlepel suiker
• 1 eetlepel gesmelte botter of olie
• 200 g korente of pitlose rosyntjies

Só maak jy

• Los die kitsgis in ’n bietjie water op totdat dit skuim.
• Gooi die meel, sout, suiker en botter of olie in ’n diep bak, voeg die water bietjies-bietjies by en meng en knie totdat die deeg sag en elasties is.
• Laat die deeg op ’n warm plek tot dubbeld die volume.
• Smeer jou hande met ’n paar druppels olie en knie die deeg af.
• Laat die deeg nog ’n slag rys.
• Knyp stukke deeg so groot soos jou handpalm af en maak plat, ronde koeke.
• Maak met die steel van ’n houtlepel op elke bolletjie twee voortjies wat mekaar kruis en druk korente daarin vas.
• Bak die koeke direk in lae asbedekte kole (óf op die rooster) vir sowat 40 minute. Draai dit 3 of 4 keer om totdat dit ligbruin is, maar steeds met as bedek.
• Sny die koek. Moenie skaam wees nie en smeer lekker dik botter en appelkooskonfyt op.

WegSleep sê

Vir die laatslapers: Die meeste supermarkte – ja, ook die 7 Eleven waar jy noodvoorraad soos Coke en Lucky Strike gaan kry – het ’n bakkery waar jy rou brooddeeg in sakkies kan koop. En dié klein supermarkte ís oop op Goeie Vrydag.