Appelkooskonfyt en gerasperde cheddarkaas op ’n roosterkoek is koningskos.  Maar as jy eers dié een probeer het, gaan jy nie terugkyk nie.

Jy benodig

• 1 wiel camembertkaas
• 1 eetlepel heuning
• ’n hand vol amandels en dennesade
• 3 groenvye
• foelie

Só maak jy

• Skeur ’n stuk foelie so lank soos ’n broodplank af en vou dit dubbeld.
• Sit die kaas in die middel van die foelie neer en vou die kante effens op om ’n bakkie te vorm.
• Sny elke groenvy in omtrent 4 wiggies en pak dit rondom die kaas.
• Sprinkel dan die neute en sade by en giet die heuning oor.
• Vou die foelie toe en sit dit oor matige kole bo-op die rooster.
• Die kaas behoort binne 5-10 minute te smelt.
• Maak die foeliepakkie versigtig oop en skep lepelsvol van die smeersel op ’n roosterkoek.

WegSleep sê:

Eet dit dadelik – as die kaas eers weer gestol het, verander die tekstuur en proe dit rubberig.